Isang Pagbabago ng Lugar

Namatay ang kaibigan kong si Joann dahil sa stroke nang magsimulang kumalat ang coronavirus noong 2020. Sa una, inanunsyo ng kanyang pamilya na ang kanyang memorial service ay gaganapin sa kanilang simbahan, ngunit napagdesisyunan na mas mabuting gawin ito sa isang punerarya upang makontrol ang dami ng mga dadalo. Ang bagong paunawa online ay nabasa: Joann Warners— Change Venue.
Oo, nagbago ang kanyang venue! Napunta siya mula sa venue ng lupa patungo sa venue ng langit. Binago ng Diyos ang kanyang buhay ilang taon na ang nakalilipas, at buong pagmamahal niyang pinaglingkuran Siya sa loob ng halos limampung taon. Kahit na malapit na siyang mamatay sa ospital, nagtanong siya tungkol sa iba pang mahal niya na nahihirapan. Ngayon siya ay naroroon kasama Niya; nagpalit na siya ng venue.
Ang apostol na si Pablo ay may hangaring makasama si Cristo sa ibang lugar (2 Corinto 5:8), ngunit naramdaman din niya na mas makakabuti para sa mga taong pinaglilingkuran niya na manatili siya sa mundo. Sumulat siya sa mga taga-Filipos, “Higit na kailangan ninyo na manatili ako sa katawan” (Filipos 1:24). Kapag nagdadalamhati tayo para sa isang tulad ni Joann, maaari tayong sumigaw sa Diyos ng isang katulad na bagay: Kailangan ko sila rito at ng marami pang minahal at pinaglingkuran nila. Ngunit alam ng Diyos ang pinakamahusay na oras para sa kanilang pagbabago ng lugar at sa atin.
Sa lakas ng Espiritu, “ginagawa nating mithiin na bigyang-kasiyahan ang Diyos” (2 Mga Taga-Corinto 5:9) hanggang sa makita natin Siya nang harapan—na higit na makakabuti.