Mapagbigay at Ibinahagi

Nang matapos kami ng aking asawa na si Cari sa aming mataas na edukasyon, mayroon kaming ilang libong dolyar na utang na kailangan naming pagsama-samahin upang makakuha ng mas mababang interes. Nag-apply kami ng loan sa lokal na bangko ngunit tinanggihan dahil hindi pa kami matagal naninirahan o nagtatrabaho sa siyudad na iyon. Ilang araw matapos iyon, ikinuwento ko ang nangyari sa kaibigan kong si Ming, na isang elder sa aming simbahan. “Gusto kong banggitin ito sa aking asawa,” sabi niya habang palabas ng pinto.
Makalipas ang ilang oras, tumunog ang telepono. Si Ming iyon: “Gusto naming ipahiram sa iyo ni Ann ang perang kailangan mo, walang interes,” alok niya. Hindi ko alam kung ano ang sasabihin ko, kaya tumugon ako, Hindi ko maaaring hingin ito sa inyo.” “Hindi ka humihingi!” Masayang sagot ni Ming. Magiliw nilang ibinigay sa amin ang utang, at binayaran namin sila ni Cari sa lalong madaling panahon.
Naniniwala ako na mapagbigay sina Ming at Ann dahil sa kanilang pagmamahal sa Diyos. Gaya ng sinasabi sa atin ng Kasulatan, “Ang kabutihan ay darating sa mga bukas-palad at nagpapahiram nang walang bayad, na nagsasagawa ng kanilang mga gawain nang may katarungan” (Awit 112:5). Ang mga nagtitiwala sa Diyos ay maaaring magkaroon ng "matatag" na mga puso na "tiwasay" (vv. 7-8), na nauunawaan na Siya ang pinagmumulan ng lahat ng mabuti sa kanilang buhay.
Ang Diyos ay mapagbigay sa atin, binibigyan tayo ng buhay at kapatawaran. Maging bukas-palad tayo sa pagbabahagi ng Kanyang pagmamahal at ng ating mga mapagkukunan sa mga nangangailangan.