Sa Gitna ng Alinlangan, May Diyos na Nakakaalam

Balisa si Karen dahil sa isang isyu sa kalusugan ng kanyang pamangking teenager, kaya't nakaramdam siya ng ginhawa nang marinig ang tungkol sa isang natural na lunas na may magandang resulta. Gayunman, nag-aalinlangan ang kanyang kapatid na babae dahil sa posibilidad ng mga side effect, batay sa medikal na kasaysayan ng kanyang anak. Nais sanang makipagtalo ni Karen, ngunit pinili niyang magpigil. Gaano man siya nababahala para sa kanyang pamangkin, kinailangan niyang igalang ang kapangyarihan at desisyon ng ina nito.
Kalaunan, sinabi ng doktor sa kanila, “Ang natural na lunas na iyon ay maaaring nagdulot ng matinding allergic reaction.” Pagdating sa kapakanan ng kanyang anak, tunay ngang mas alam ng ina kung ano ang pinakamabuti para sa kanya—sa mga paraang hindi alam ni Karen. Naalala ni Karen ang pangyayaring ito tuwing siya’y nababahala para sa iba pa niyang mga mahal sa buhay, habang hinihiling sa Diyos na tulungan sila ayon sa paraan na iniisip niyang nararapat. Naalala niya na ang Diyos, na higit na nagmamahal at lubos na nakakakilala sa kanila kaysa sa kanya, ang tunay na nakakaalam ng pinakamabuti.
Sa Isaias 55:9, sinabi ng Diyos, “Kung paanong ang langit ay mas mataas kaysa sa lupa, gayon din ang aking mga daan ay mas mataas kaysa sa inyong mga daan.” Ang salitang Hebreo para sa daan (derek) ay hindi lamang tumutukoy sa direksyon kundi sa mga moral na kilos at asal ng Diyos—banal, puno ng karunungan, at laging mabuti. Taliwas ito sa mga daan ng tao na madalas ay may pagkukulang, makitid ang pananaw, o makasarili. Ang paalaalang ito ay nagbibigay ng kaaliwan kapag ang mga pangyayari sa buhay ay hindi ayon sa ating inaasahan, lalo na sa buhay ng mga mahal natin. Maaaring hangad natin ang kagalingan, pagbabago, o mabilisang solusyon, ngunit ang Diyos, sa Kanyang perpektong karunungan, ang nakakakita ng buong larawan at kumikilos sa paraang lampas sa ating pang-unawa. Ang Kanyang mga layunin ay laging nakaugat sa Kanyang pag-ibig, kahit pa iba ang resulta kaysa sa ating inaasam. Kaya’t hinihikayat tayo sa Filipos 4:6 na ihandog ang ating mga kahilingan sa Diyos—hindi upang kontrolin ang mga bagay, kundi upang ipagkatiwala ito sa Kanya na may hawak ng lahat. Araw-araw nating maipagkakatiwala sa Kanya ang ating mga mahal sa buhay, dahil alam nating Siya’y laging mapagmalasakit, mahabagin, at makapangyarihan. Gaya ng sinasabi sa Isaias 55:3, 7–11, ang Salita at mga pangako ng Diyos ay hindi bumabalik na walang kabuluhan. Natutupad ng mga ito ang Kanyang layunin—mga layuning maaaring hindi natin lubos na maunawaan, ngunit ganap nating mapagkakatiwalaan.