Nakita Ko ang Katapatan ng Diyos

Sa kabuuan ng kanyang makasaysayang pitumpung taon bilang pinuno ng Britain, isang talambuhay lang ang inendorso ni Queen Elizabeth II tungkol sa kanyang buhay na may personal na paunang salita, The Servant Queen and the King She Serves. Inilabas bilang pagdiriwang ng kanyang ika-siyamnapung kaarawan, ikinuwento ng aklat kung paano siya ginabayan ng kanyang pananampalataya sa paglilingkod niya sa kanyang bansa. Sa paunang salita, nagpahayag ng pasasalamat si Queen Elizabeth para sa lahat ng nanalangin para sa kanya, at nagpasalamat siya sa Diyos para sa Kanyang matatag na pagmamahal. Nagtapos siya, “Talagang nakita ko ang Kanyang katapatan.”
Ang simpleng pahayag ni Queen Elizabeth ay sumasalamin sa mga patotoo ng kalalakihan at kababaihan sa buong kasaysayan na nakaranas ng personal, tapat na pangangalaga ng Diyos sa kanilang buhay. Ito ang tema na pinagbabatayan ng isang magandang awiting isinulat ni Haring David habang nagninilay-nilay sa kanyang buhay. Nakatala sa 2 Samuel 22, ang awit ay nagsasalita tungkol sa katapatan ng Diyos sa pagprotekta kay David, paglalaan para sa kanya, at maging sa pagliligtas sa kanya kapag ang kanyang buhay ay nasa panganib (vv. 3–4, 44). Bilang tugon sa kanyang karanasan sa katapatan ng Diyos, isinulat ni David, “Aawitin ko ang mga papuri sa iyong pangalan” (v. 50).
Bagama't may dagdag na kagandahan kapag ang katapatan ng Diyos ay nakikita sa mahabang buhay, hindi natin kailangang maghintay upang isalaysay ang Kanyang pangangalaga sa ating buhay. Kapag kinikilala natin na hindi ang ating sariling mga kakayahan ang nagdadala sa atin sa buhay kundi ang tapat na pangangalaga ng isang mapagmahal na Ama, tayo ay nauudyukan sa pasasalamat at papuri.