Mga Tao ng Kanlungan

Sina Phil at Sandy, na naantig sa mga kuwento ng mga batang refugee, ay nagbukas ng kanilang puso at tahanan sa dalawa sa kanila. Pagkatapos nilang sunduin sila sa airport, tahimik silang nagmaneho pauwi. Handa na kaya sila para dito?Hindi sila magkapareho ng kultura, wika, o relihiyon, ngunit sila ay naging mga taong kanlungan para sa mahalagang mga batang ito.
Naantig si Boaz sa kuwento ni Ruth.Narinig niya kung paano niya iniwan ang kanyang mga tao upang suportahan si Naomi, at nang dumating si Ruth upang mamulot sa kanyang bukid, ipinagdasal ni Boaz ang pagpapalang ito para sa kanya, “Pagbabayaran ka nawa ng Panginoon sa iyong ginawa. Gagantimpalaan ka nawa ng Panginoon, ang Diyos ng Israel, na sa ilalim ng kanyang mga pakpak ay naparito ka upang magkanlong” (Ruth 2:12).
Binanggit ni Ruth ang pagpapala ni Boaz nang siya ay magising sa gitna ng gabi. Nagising sa paggalaw sa kanyang paanan, nagtanong si Boaz, “Sino ka?” Sumagot si Ruth, “Ako ang iyong lingkod na si Ruth.Ibukas mo ang sulok ng iyong damit sa akin, sapagkat ikaw ang aming tagapagligtas at katulong na magliligtas ng aming pamilya" (3:9).
Ang salitang Hebreo para sa sulok ng iyong damit at mga pakpak ay pareho. Si Boaz ay nagbigay ng kanlungan kay Ruth sa pamamagitan ng pagpapakasal sa kanya, at ang kanilang apo-sa-tuhod na si David ay nagpahayag ng kanilang kuwento sa kanyang papuri sa Diyos ng Israel: “Napakahalaga ng iyong walang hanggang pag-ibig, O Diyos!” isinulat niya. “Ang mga tao ay nanganganlong sa lilim ng iyong mga pakpak” (Awit 36:7).