Pagpili ng Buhay

Lumaki si Nathan sa isang pamilyang naniniwala kay Cristo, ngunit unti-unti siyang naligaw sa kanyang pananampalataya noong siya’y nasa kolehiyo, nalulong sa mga bisyo tulad ng pag-inom at pagdalo sa mga party. “Dinala ako ng Diyos pabalik sa Kanya kahit hindi ko ito karapat-dapat,” ani Nathan. Sa paglipas ng panahon, ginugol niya ang isang tag-init sa pagbabahagi tungkol kay Jesus sa mga estranghero sa mga lansangan ng malalaking lungsod sa US. Sa ngayon, tinatapos niya ang isang residency sa youth ministry sa kanilang simbahan. Layunin ni Nathan na tulungan ang kabataan na huwag sayangin ang oras sa hindi pamumuhay para kay Cristo.
Katulad ni Nathan, si Moises, ang lider ng mga Israelita, ay may malasakit din para sa susunod na henerasyon. Alam niyang malapit na siyang bumitaw sa pamumuno, kaya ibinahagi niya ang mabubuting alituntunin ng Diyos sa mga tao at ipinaliwanag ang magiging bunga ng pagsunod o pagsuway: pagpapala at buhay para sa pagsunod, sumpa at kamatayan para sa pagsuway. Sinabi niya, “Ngayon ay piliin ninyo ang buhay, upang kayo at ang inyong mga anak ay mabuhay. Sapagkat ang Panginoon ang inyong buhay” (Deuteronomio 30:19-20). Hinikayat sila ni Moises na mahalin ang Diyos, “makinig sa Kanyang tinig, at manatiling tapat sa Kanya” (talata 20).
Ang pagpili ng kasalanan ay may kaakibat na kaparusahan. Ngunit kapag isinuko natin muli ang ating buhay sa Diyos, tiyak na magkakaroon Siya ng awa (talata 2-3) at ibabalik tayo (talata 4). Ang pangakong ito ay natupad sa kasaysayan ng mga Israelita at higit na naisakatuparan sa huling gawain ni Jesus sa krus upang dalhin tayo sa pakikiisa sa Diyos.
Tayo rin ay may pagpipilian ngayon: Malaya tayong pumili ng buhay.